А вы ведаеце, адкуль бяруцца дакладныя прагнозы надвор'я і як вымяраюць чысціню паветра ў нашым горадзе? На днях навучэнцы індустрыяльнага каледжа пабывалі з займальнай экскурсіяй у Філіяле «Магілёўаблгідрамет».

Рабятам выпала рэдкая магчымасць зазірнуць «за кулісы» службы надвор'я і ўбачыць на свае вочы тое, пра што звычайна кажуць толькі ў падручніках. Іх правялі па аддзелах, паказалі сучаснае метэаралагічнае абсталяванне, расказалі, як фіксуюцца параметры атмасферы, нараджаюцца штармавыя папярэджанні і вядуцца экалагічныя назіранні.

Сустрэча атрымалася па-сапраўднаму жывой і пазнавальнай: спецыялісты дзяліліся прафесійнымі сакрэтамі, а хлопцы задавалі ім пытанні. Хто ведае, можа для кагосьці з гэтых навучэнцаў гэты візіт стане першым крокам да выбару будучай прафесіі!