02.06.2020
Кліматычная характарыстыка мая 2020 года
Май 2020 года ў Беларусі быў халадней, чым звычайна на 2,4°С, яго сярэдняя тэмпература склала 11,0°С. Апошні раз такі халодны май у Беларусі быў адзначаны ў 1999 годзе. Пачынаючы з 1945 года, такая тэмпература ў маі бывае ў сярэднім прыкладна раз у 6 гадоў.
Адмоўная анамалія тэмпературы паветра распаўсюдзілася па ўсёй тэрыторыі краіны, дасягнуўшы найбольшых значэнняў у Гомельскай вобласці (у сярэднім па вобласці -2,8°С), найменшых – у Віцебскай вобласці (у сярэднім па вобласці -2,1°С).
Адхіленне сярэдняй месячнай тэмпературы паветра мая
ад кліматычнай нормы па Рэспубліцы Беларусь
У дзённыя гадзіны тэмпература ў асноўным павышалася да +15°С і вышэй, а ў самыя цёплыя дні - да +20°С і вышэй. Максімальнае значэнне тэмпературы паветра (+28,9°С) адзначана ў Жыткавічах 11 мая.
У начныя гадзіны тэмпература паветра вагалася ад +1°С да +10°С, у асобныя цёплыя ночы павышалася да +11 +14°С, а ў самыя халодныя ночы месцамі адзначаліся замаразкі ў паветры інтэнсіўнасцю да -1 -3°С. Мінімальнага значэння за месяц (-3,7°С) тэмпература паветра дасягнула ў Бярэзінскім запаведніку 1 мая.
Усе дэкады месяца характарызаваліся сярэдняй тэмпературай ніжэй за кліматычную норму. Найбольш халоднай выдалася другая дэкада мая са сярэднедэкаднай тэмпературай на 4,0°С ніжэй за норму. У першай дэкадзе тэмпература была ніжэй за норму на 0,4°С, у трэцяй - на 2,9°С.
Сярэдняя тэмпература паветра і кліматычная норма
па дэкадах мая 2020 года па тэрыторыі Беларусі
У маі 2020 года ў сярэднім па краіне назіралася празмернасць ападкаў-выпала 75 мм або 127 % кліматычнай нормы, аднак па тэрыторыі краіны яны распаўсюджваліся нераўнамерна. Больш за ўсё ападкаў выпала на тэрыторыі Гомельскай вобласці – у сярэднім па вобласці 94 мм або 165% нормы - такая вялікая колькасць ападкаў для гэтага рэгіёну адзначаецца прыкладна раз у 15 гадоў, пачынаючы з 1945 года. Найменш увільгатнённай апынулася Мінская вобласць, дзе за месяц у сярэднім па вобласці выпала 58 мм ападкаў або 96% нормы.
Колькасць ападкаў за май 2020 года і кліматычная норма
па абласцях і тэрыторыі Беларусі
Па дэкадах колькасць ападкаў размяркоўвалася нераўнамерна: у другой дэкадзе колькасць ападкаў адпавядала кліматычнай норме. У першай і трэцяй дэкадах назіралася празмернасць ападкаў.
Колькасць ападкаў і кліматычная норма
па дэкадах мая 2020 года па тэрыторыі Беларусі
Ападкі выпадалі часта, у асобныя суткі іх колькасць месцамі перавышала 20 мм. Максімальная сутачная колькасць ападкаў (41,0 мм) зарэгістравана 7 мая ў Касцюковічах і 30 мая ў Ганцавічах. Дажджы месцамі суправаджаліся навальніцамі, градам і ўзмацненнем ветру парывамі да 15-22 м/с. Максімальная хуткасць ветру (22 м/с) зарэгістраваная 12 мая ў Горках.
