Кліматычная характарыстыка вясны 2020 года

Адхіленне сярэдняй тэмпературы паветра за вясну

ад кліматычнай нормы па Рэспубліцы Беларусь

Станоўчая анамалія тэмпературы паветра гэтай вясной распаўсюдзілася па ўсёй тэрыторыі краіны. Максімальныя значэнні адхіленняў адзначаны ў Віцебскай і Магілёўскай абласцях (у сярэднім па кожнай вобласці +0,3°С), мінімальныя – у Мінскай і Брэсцкай абласцях (у сярэднім па кожнай вобласці +0,1°С).

Тэмпература паветра ў сакавіку была на 3,4°С вышэй кліматычнай нормы, у красавіку і маі – ніжэй нормы (на 0,5 і 2,4°С адпаведна).

Сярэдняя тэмпература паветра і кліматычная норма

за месяцы вясновага сезону 2020 года па Рэспубліцы Беларусь

Устойлівага пераходу сярэдняй сутачнай тэмпературы паветра праз 0°С у бок павышэння (пачатак вясны ў кліматалогіі) ў Беларусі сёлета не адзначалася, паколькі не наступала кліматычная зіма (не ажыццявіўся пераход сярэдняй сутачнай тэмпературы паветра праз 0°С у бок паніжэння ў зімовыя месяцы).

Сакавік быў цёплым - сярэдняя тэмпература паветра за месяц склала +3,6°С, што вышэй за кліматычную норму на 3,4°С. Так цёпла ў сакавіку на тэрыторыі краіны бывае прыкладна адзін раз у 10-15 гадоў. Станоўчая анамалія тэмпературы паветра распаўсюдзілася паўсюдна, дасягнуўшы найбольшых значэнняў у Магілёўскай вобласці (у сярэднім па вобласці 4,0°С), а найменшых – у Брэсцкай вобласці (у сярэднім па вобласці 2,8°С). Мінімальнае значэнне тэмпературы паветра зарэгістравана 24 сакавіка на станцыі Бярэзінскі запаведнік (-10,9°С) - гэта самая нізкая тэмпература за сезон.

У красавіку сярэдняя па краіне тэмпература паветра склала +6,8°С, што ніжэй за кліматычную норму на 0,5°С. Адмоўная анамалія распаўсюдзілася па ўсёй тэрыторыі Беларусі, дасягнуўшы найбольшых значэнняў па Магілёўскай вобласці - ў сярэднім па вобласці -0,8°С. Найменшыя адмоўныя адхіленні тэмпературы ад кліматычнай нормы адзначаны ў Гродзенскай і Брэсцкай абласцях (у сярэднім па кожнай вобласці -0,2°С).

Май быў халодным - сярэдняя тэмпература склала +11,0°С, што ніжэй за кліматычную норму на 2,4°С. Апошні раз такі халодны май у Беларусі быў адзначаны ў 1999 годзе. За пасляваенны перыяд такая тэмпература ў маі бывае ў сярэднім прыкладна раз у 6 гадоў. Адмоўная анамалія тэмпературы паветра распаўсюдзілася па ўсёй тэрыторыі краіны, дасягнуўшы найбольшых значэнняў у Гомельскай вобласці (у сярэднім па вобласці -2,8°С), найменшых – у Віцебскай вобласці (у сярэднім па вобласці -2,1°С). Максімальнае значэнне тэмпературы паветра (+28,9°С) адзначана ў Жыткавічах 11 мая – гэта самая высокая тэмпература паветра за сезон.

Колькасць ападкаў за вясну 2020 года і кліматычная норма

па абласцях і тэрыторыі Беларусі

За вясновы сезон на тэрыторыі краіны выпала ў сярэднім 121 мм ападкаў або 89% кліматычнай нормы. Максімальная колькасць ападкаў зарэгістравана ў Магілёўскай вобласці - 155 мм або 120% кліматычнай нормы. На астатняй тэрыторыі адзначаны дэфіцыт ападкаў, а мінімальная іх колькасць зарэгістравана ў Мінскай вобласці – 101 мм або 72% кліматычнай нормы.

Рэжым ўвільгатнення на працягу сезона быў неаднародным. У сакавіку ў сярэднім па Беларусі выпала 34 мм ападкаў, што склала 86% кліматычнай нормы. Празмернасць увільгатнення адзначалася на тэрыторыі Магілёўскай вобласці, дзе на працягу месяца выпала 47 мм або 131% нормы. Па астатняй частцы краіны сума ападкаў была ніжэй за норму і найменшая іх колькасць адзначана ў Брэсцкай вобласці – 23 мм або 65% нормы. Ападкі выпадалі ў выглядзе дажджу, снегу і мокрага снегу. Снежнае покрыва на большай частцы тэрыторыі краіны адсутнічала, толькі месцамі пры выпадзенні ападкаў у выглядзе снегу яно ўсталёўвалася на непрацяглы час. На апошні дзень месяца снежнае покрыва вышынёй 0,1-6 см адзначалася пераважна па ўсходзе і паўднёвым усходзе краіны. У асобныя суткі месцамі па рэспубліцы адзначаліся туманы, слабы галалёд, на асобных участках дарог галалёдзіца. У Гродне 14 сакавіка назіралася мяцеліца. У асобных раёнах адзначаліся навальніцы, град, узмацненне ветру парывамі 20 м/с і больш. Максімальная хуткасць ветру, якая дасягнула крытэрыяў АЗ, зарэгістравана на станцыі Ашмяны (25 м/с) 13 сакавіка і Гродна (27 м/с) 14 сакавіка – гэта найбольшая хуткасць ветру за вясновы сезон.

У красавіку ў сярэднім па Беларусі выпала 13 мм ападкаў, што склала 34% кліматычнай нормы. У ранжыраваным шэрагу назіранняў ад самага сухога да самага вільготнага, красавік 2020 года заняў 4 месца. Самым засушлівым з'яўляецца красавік 2019 года з сярэдняй па краіне сумай ападкаў роўнай 7,0 мм. Дэфіцыт увільгатнення адзначаўся па ўсёй тэрыторыі краіны. Больш за усё ападкаў выпала ў Віцебскай і Магілёўскай абласцях, дзе выпала па 17 мм ападкаў, што складае 44 і 42% нормы адпаведна. Менш за ўсё ападкаў адзначана ў Гомельскай вобласці - 8 мм або 19% нормы. На працягу месяца ў асобныя суткі адзначаліся навальніцы, месцамі град, назіраліся туманы, у пачатку месяца - галалёд. У красавіку максімальныя парывы ветру дасягалі 15-24 м/с.

У маі ў сярэднім па краіне назіралася празмернасць ападкаў - выпала 75 мм або 127% кліматычнай нормы, аднак па тэрыторыі краіны яны распаўсюджваліся нераўнамерна. Больш за ўсё ападкаў выпала на тэрыторыі Гомельскай вобласці – ў сярэднім па вобласці 94 мм або 165% нормы - такая вялікая колькасць ападкаў для гэтага рэгіёну адзначаецца прыкладна раз у 15 гадоў, пачынаючы з 1945 года. Менш за ўсё ападкаў выпала ў Мінскай вобласці - 58 мм ападкаў або 96% нормы. Ападкі выпадалі часта, у асобныя суткі іх колькасць месцамі перавышала 20 мм. Максімальная сутачная колькасць ападкаў (41,0 мм) зарэгістравана 7 мая ў Касцюковічах і 30 мая ў Ганцавічах. Дажджы месцамі суправаджаліся навальніцамі, градам і ўзмацненнем ветру парывамі да 15-22 м/с.

Сярэдняя колькасць ападкаў і кліматычная норма

за месяцы вясновага сезону 2020 года па Рэспубліцы Беларусь