БЕЛГIДРAМЕТ

Ru Be En

Галоўная / Інфармацыя / Iнфармацыя кліматолага

06.06.2022

Кліматычная характарыстыка вясны 2022 года

Сярэдняя тэмпература паветра вясновага сезона 2022 года склала 6,2°С, што на 1,1ºС ніжэй за кліматычную норму. Мінулы вясновы сезон заняў толькі 78 месца ў ранжыраваным шэрагу назіранняў ад самага халоднага да самага цёплага сезона, пачынаючы з 1881 года.

Адхіленне сярэдняй месячнай тэмпературы паветра вясновага сезона ад кліматычнай нормы (7,3ºС) па Рэспубліцы Беларусь

Па большай частцы тэрыторыі краіны адмоўная анамалія сезоннай тэмпературы паветра знаходзілась ў межах 1,0-1,5 ºС.

Адхіленне (°С) сярэдняй тэмпературы паветра вясновага сезона ад кліматычнай нормы па тэрыторыі Беларусі

Найбольшыя адмоўныя адхіленні тэмпературы паветра ад кліматычнай нормы былі адзначаны на тэрыторыі Мінскай вобласці (у сярэднім па вобласці -1,4°С), найменшыя - на тэрыторыі Гродзенскай вобласці (у сярэднім па вобласці -1,0°С). Тэмпературны рэжым вясновага сезона быў неаднародным: сярэдняя тэмпература сакавіка была блізкая да нормы (станоўчая анамалія склала 0,3°С). Красавік і май былі халоднымі з адмоўнай анамаліяй роўнай 2,1 і 1,8°С адпаведна.

Сярэдняя тэмпература паветра і кліматычная норма па месяцах вясновага сезона 2022 года па Рэспубліцы Беларусь

Устойлівы пераход сярэднесутачнай тэмпературы паветра праз 0°С у бок павышэння (канчатак зімы - пачатак вясны ў кліматалогіі) адбыўся па заходняй палове Гродзенскай і паўднёвай палове Мінскай вобласці, па ўсёй тэрыторыі Брэсцкай і Гомельскай абласцей 4-15 лютага, што на 2-4 тыдні раней за звычайныя тэрміны. Па астатняй тэрыторыі краіны пераход адбыўся 13-20 сакавіка на 1-2 тыдні пазней за ўстаноўлены час.

Сярэдняя па Беларусі тэмпература паветра за сакавік 2022 года склала 1,1°С, што вышэй за кліматычную норму на 0,3°С. Максімальнага значэння (+19,2°С) тэмпература паветра дасягнула 23 сакавіка на станцыі Высокае. Мінімальная тэмпература паветра адзначана на станцыі Езярышча 10 сакавіка і склала -19,9°С, дасягнуўшы самага нізкага значэння за бягучы сезон.

Сярэдняя па Беларусі тэмпература паветра за красавік 2022 года склала 5,7°С, што ніжэй за кліматычную норму на 2,1°С. Максімальнага значэння (+20,9 ° С) тэмпература паветра дасягнула 15 і 25 красавіка на станцыі Лельчыцы. Мінімальная тэмпература паветра адзначана на станцыі Пружаны 4 красавіка і склала -9,0°С.

Устойлівы пераход праз 5°С у бок павышэння (пачатак вегетацыйнага перыяду) ажыццявіўся па большай частцы тэрыторыі краіны 7 красавіка ў тэрміны блізкія да звычайных, а ў асобных раёнах (у цэнтральнай і паўночна-ўсходняй частках краіны) - у другой дэкадзе месяца - 13-19 красавіка. Вегетацыйны перыяд пачаўся на 1-9 дзён пазней за ўстаноўленыя тэрміны.

Сярэдняя па Беларусі тэмпература паветра за май 2022 года склала 11,6°С, што ніжэй за кліматычную норму на 1,8°С. Максімальнага значэння (+29,7°С) тэмпература паветра дасягнула 12 мая на станцыі Лельчыцы (самая высокая тэмпература паветра за сезон). Мінімальная тэмпература паветра адзначана на станцыях Езярышча і Бярэзінскі запаведнік 5 мая і склала -4,3°С.

Устойлівы пераход праз 10°С у бок павышэння (пачатак перыяду актыўнай вегетацыі) ажыццявіўся ў асноўным у трэцяй дэкадзе красавіка - першай дэкадзе траўня на адну-два тыдні пазней звычайных тэрмінаў. Толькі па крайнім паўночным усходзе (Езярышча) перыяд актыўнай вегетацыі пачаўся на тры тыдні пазней звычайнага - у трэцяй дэкадзе мая (22 мая).

За вясну ў сярэднім па краіне выпала 154,4 мм ападкаў, што складае 110 працэнтаў кліматычнай нормы за сезон. Па тэрыторыі краіны ўмовы ўвільгатнення былі неаднародныя. Па большай частцы тэрыторыі краіны выпала 80-150 працэнтаў сезоннай нормы.

Адхіленне (%) месячнай сумы ападкаў за вясновы сезон ад кліматычнай нормы па тэрыторыі Беларусі

У абласным разрэзе найбольшая колькасць ападкаў адзначана на тэрыторыі Магілёўскай вобласці (196,7 мм або 144 працэнты нормы сезона). Найменшая - у Віцебскай вобласці - 111,7 мм або 80% нормы.

Колькасць ападкаў за вясну 2022 года і кліматычная норма па абласцях і тэрыторыі Беларусі

На працягу вясны на тэрыторыі Беларусі ападкі выпадалі нераўнамерна.

Істотны недабор ападкаў назіраўся ў сакавіку (17 працэнтаў нормы). Сакавік 2022 года стаў самым засушлівым за ўсю гісторыю назіранняў, пачынаючы з 1945 года. На 19 станцыях на тэрыторыі Віцебскай, Гродзенскай, Мінскай і Брэсцкай абласцей былі абноўлены гістарычныя мінімумы сумы ападкаў за месяц. Па большай частцы тэрыторыі краіны выпала 1-30% нормы. Па паўднёвым усходзе выпала найбольшая колькасць ападкаў - больш за 45% нормы.

Залішняе ўвільгатненне адзначалася ў красавіку (выпала 222% нормы). Красавік 2022 год стаў самым вільготным за перыяд гадоў, пачынаючы з 1945 года. На 9 станцыях на тэрыторыі Мінскай, Магілёўскай і Гомельскай абласцей былі абноўлены гістарычныя максімумы сумы ападкаў за месяц.

У маі сума ападкаў за месяц была блізкая да нормы (98% нормы).

Колькасць ападкаў і кліматычная норма па месяцах вясны 2022 года

У весну ападкі выпадалі пераважна ў выглядзе дажджу, у пачатку сезона таксама адзначаліся змешаныя і цвёрдыя ападкі. У першай дэкадзе сакавіка снежнае покрыва ў асноўным захоўвалася па большай частцы тэрыторыі Віцебскай і Магілёўскай, а таксама на асобных пунктах назірання Мінскай і Гродзенскай абласцей. Па астатняй тэрыторыі наяўнасць снежнага покрыва насіла эпізадычны характар. У другой і трэцяй дэкадах сакавіка працягвалася разбурэнне снежнага покрыва, але ў сувязі з выпадкамі выпадзення снегу ў канцы месяца ў асобных раёнах краіны адзначалася снежнае покрыва вышынёй ад 0,1 см (Вілейка, Езярышча) да 5 см (Орша). Поўнае разбурэнне снежнага покрыва на тэрыторыі Беларусі адбылося ў канцы сакавіка - пачатку красавіка.

На працягу вясны паўсюдна адзначалася ўзмацненне хуткасці ветру парывамі да 15 м/с і больш, месцамі дасягнула крытэрыю небяспечнай гідраметэаралагічнай з'явы (25 м/с і больш). Максімальная хуткасць ветру за сезон зарэгістраваная на станцыі Клічаў 12 мая (31 м/с).

Пры выкарыстанні інфармацыі спасылка на Белгідрамет абавязкова